بسم الله الرحمن الرحيم
#انا_و_مفعوصتي .. الاخيره
ام مفعوصه صحيت من الساعه خمسه الفجر قامت عملت كوبايه نسكافيه كده و فتحت الانترنت تجيب وصفات الاكلاللي هتعملها ف حفله عيد ميلاد مفعوصه ، جابت طريقه الاكل و الحلويات و نقلتهم ف ورقه و علقتها ع خشب المطبخ ، و دخلت تصحي ابو مفعوصه علشان يروح شغله .. ابو مفعوصه صحي و لبس و نزل ع شغله
ام مفعوصه دخلت الاوضه ع مفعوصه
انا : انتي يا بت يا مفعوصه قومي علشان تساعديني
مفعوصه : انا اصلا فاشله يا حاجه سببيني انام بقي !
انا : يلا يا بت بدل ما اوريكي سواد ع الصبح و اطلع ابطح موكوس و امه
مفعوصه : يوووووه بقي يا مامي عيب تمسكي بنتك حبيبتك من دراعها اللي مش بيوجعها .. اجي اضربه معاكي ؟
انا : عااااا قومي يا مفعوصه بدل ما ابهدلك
مفعوصه : خلاص خلاص قايمه اهو .. حرااام ياربي حرام
انا : بتقولي ايه يا بت
مفعوصه : بقول " لما ام مفعوصه تقولي اصحي يبقي مفيش نوم" .. و كملت .. قهر و ظلم !
انا : طب يلا يلا
مفعوصه قامت و بداو يعملوا الاكل و حطوه كله ف الفرن وراحت ام مفعوصه تعلق الزينه و مفعوصه تنفخ البلالين
بعد نص ساعه من طلوع سلم و نزول سلم و اقطعيلي لازق يا مفعوصه علشان الزينه هتقع مني
انا : هههههههههههههه ام موكوس حرقت اكلها تاني .. الست دي فاشله اووي مش عارفه ازاي جوزها عايش معاها
مفعوصه بتشم و تمشي ورا الريحه : يالهوووووي الحقي يا حاجه مطبخك بيولع
ام مفعوصه قامت تجري تشوف المطبخ و البوتجاز اللي كل الاكل اللي فيه بقي اسود
انا : عااا انتي السبب يا فاشله ايه اللي خلاني ادخلك معايا عااا
مفعوصه : هو ايه اللي انا السبب يا حاجه ارحمي اهلنا بقي عاااا لما انتي مش بتعرفي تطبخي وجعتي دماغنا معاكي ليه ما كنا اشترينا جاهز
انا : اه يا قلبي يا انا يا اما العيال زي الفل الا بنتي انا فاشله
مفعوصه : ايوه ايووه عيشي ف الدور بقي .. انا اصلا معملتش غير السلطه
انا : و فرحانه يا فاشله .. اجري يا بت روحي اتصلي بابوكي يخرج م الشغل بدري و يجيب الاكب جاهز معاه
مفعوصه بعصبيه : ما قلنا كده م الاول ولا كنتي عايزه تجربي تولعي ف الشقه .. اه منك انتي ااه
مفعوصه راحت اتصلت ب باباها
ابو مفعوصه : الو
مفعوصه : ايوه يا بابي
ابو مفعوصه : هههههههههههه امك بوظت ايه !
مفعوصه : عرفت منين ؟!
ابو مفعوصه : من صوتك
مفعوصه : حرقت الاكل كله و قالتلي اكلمك تخرج بدري م الشغل و تجيب الاكل معاك
ابو مفعوصه : هههههههههه زي كل سنه يعني ، مش عارف امك بتعاند ليه
مفعوصه : امي دي تكفير ذنوب .. ربنا بيحبنا و لما بيحب حد بيبتليه ؛ ما علينا يا حاج متتاخرش الله يكرمك
ابو مفعوصه : عيب عليكي البسي انتي و امك و ظبطوا نفسكم و الشقه و جهزيلي بدلتي يا مفعوصتي
مفعوصه : انتا نؤمر يا معلمي
ابو مفعوصه : سلام انتا يا برنس
مفعوصه : سلام يا باشا
قفلت مفعوصه مع باباها و بعدين راحت لمامتها حكت المكالمه و قالتلها المفروض يعملوا ايه و بعدين دخلوا الاتنين يلبسوا
كانت ام مفعوصه لابسه بنطلون اسود و معاه جاكيت ابيض
و مفعوصه كانت لابسه فستان شيفون ف حرير مع بعض
بدات الناس تيجي و كانوا التلاته جاهزين و الشقه جاهزه و متوضبه و التورته محطوط فيها شمع بسنين مفعوصه
و طفوا النور بس مفعوصه كانت مضايقه ، يا تري من ايه !
بداوا يغنوا .. يلا حالا بالا بالا حيوا ابو الفصاد هيكون عيد ميلاده الليله اسعد الايام فليحيا ابو الفصاد
و بعدين ام مفعوصه و ابو مفعوصه بدأوا يغنوا
كان يوم اسود يوم ما جيتي
بابا و ماما سابو البيت
و الشغاله جاتها حاله
و الطباخ حرق البيت
راح حد من بعيد و الدنيا ضلمه رد عليهم
كان يوم ابيض يوم ما جيتي
بابا و ماما رجعوا البيت
و الشغاله سابتها الحاله
و الطباخ طفي البيت
كلهم بصوا ع الصوت لقيوا ..
موكوس لابس بدله سودا و ماسك ف ايديه بوكيه ورد كبير ورد ابيض و احمر مرسوم بيهم كلمه بحبك ف نص الورد
مفعوصه جريت ع موكوس اخدت الورد منه
موكوس : اسف يا حبيبتي المدير عطلني عن معاد خروجي ..
مفعوصه : اصلا اصلا زعلانه
موكوس : لالا انا مرضاش خطيبتي حبيبتي تزعل مني
سقف ب ايديه .. فراح دخل واحد معاه جيتار و بدا يعزف و واحد تاني وراه دخل رمي حوالي ١٠٠ بلونه جوه الشقه و بدأ يعزف و يغني اغنيه رومانسي
و بعدين مفعوصه و مسكت ف دراعه
مفعوصه : اصلا اصلا مش بقدر ازعل منك
موكوس : احم احم ما انا عارف بقي
استووب بقي ثواني
انتوا اكيد مش فاهمين حاجه .. مفعوصه كبرت و بقي عندها ٢٣ سنه و اتخرجت من كليه طب اسنان اما موكوس فهو اتخرج من هندسه و شغال ف شركه و الاتنين اتخطبوا من شهرين بس !
مش هتقولولهم مبروك بقي ولا ايه .. الله
